REVISTA MATA JOVE

EL MONTAÑISMU N´ASTURIES.

Consideramos que’l montañismu entama n´Asturies nel añu 1.904 cola primer ascensión al Picu Urriellu pol Marqués de Villaviciosa, Don Pedro Pidal y el so collaciu Gregorio Pérez “El Cainejo”. Esta efeméride constitúi’l puntu de partida de la historia del montañismu asturianu, rescamplando ente otros pola so aportación a la conocencia de la nuestra montaña J. Ramón Lueje, gran amante y poeta de les nuestres cimeres. Anguaño practiquen esti deporte bien de ciudadanos/es asturianos/es.

​

ENTREVISTA A UN MONTAÑERU.

Vamos entrevistar a Fonso Martín Sánchez. Ye aficionáu al monte dende nenu y gran conocesor de la xeografía y montaña asturiana.

​

Fonso, ¿Cómo entamó la to aficción?

Cuando yera pequeñu mandáronme a los scouts y ellí deprendí l’amor pola naturaleza sobre manera por subir picos y peñes. Na mio casa nun había aficción y dexáronme dir s’escursión con un grupu de monte. Concretamente col Grupo Covadonga de Xixón. La primer ruta que fici foi ‘l desfiladeru de Les Xanes. Ehí ye cuando entamó la mio aficción.

​

¿Cuántu tiempu lleves faciendo montañismu?

La primer vez que salí al monte tenía trece añinos y nun diba cola familia. La xente del grupu sorprendíase porque llevaba les rutes estudiaes y prestábame a esgaya conocer los nomes de los llugares y los montes. Fui deprendiendo poquín a poco la xeografía d’Asturies.

​

¿Prestaríate conocer a un montañeru famosu?

Sí, claro: hai grandes alpinistes pero voi facer alcordanza del más queríu por min: Don José Ramón Lueje. Ye ún de los pioneros de la Montaña Asturiana y percorrióla de llau a llau llevantando mapes y recuperando nomes de picos, peñes, viesques y mayaes. Ye una pena que morriera porque tendríame prestao subir con él a les cimes. Sicasí, lleo davezu los sos llibros. Prestaríame tamién conocer a daqué alpinista que subió a los ochomiles.

​

¿Qué montañes percorriesti na to carrera?

Percorrí toa mena de montañes: subí les más arispies, nos Los Picos d’Europa, como La Torre Cerréu (2.650m) o La Torre La Palanca (2.614m). Ye un paisaxe duru pa caleyar y a vegaes hai qu’usar les manes y esguilar. Tamién subí munches del Cordal Cantábricu como Pena Ubiña (2.417m) pero tamién visité xerres costeres como’l Sueve o’l Cuera que tán al llau de la mar.

​

¿Cuándo dexes la to carrera, a qué vas dedícate?

Yo nun gano perres con esto. Fáigolo por aficción. Préstame tamién dir con amigos y amigues que-yos gusta. Pienso caleyar y subir picos hasta vieyu, siempre que’l cuerpu me dexe, claro. Conozo xente de más d’ochenta años qu’aínda suben montes. Ye perimportante nesti deporte l’espíritu de superación. Tou monte ye un retu.

​

¿Prestaríate que la to muyer fora tamién montañera?

Nesti momentu nun tengo pareya. Ye perdifícil alcontrar una moza a la que-y preste’l  monte y comparta esta aficción contigo. Ente los montañeros y montañeres dizse que munchos y munches nun tienen pareya porque tán namoraos del monte y el monte ye la nuesa pareya. Pero toi abiertu a toles posibilidaes colo cualo nun descarto nada nel futuru.

Pa finar, aconséyovos a tolos mozos y moces que vos aficionéis a esti deporte tan guapu que que ta en contactu cola naturaleza.  

    

Munches gracies por concedenos esta entrevista, esperamos que descubras munches más montañes y conozas a dalguna muyer!

ENTAMU. EL MONTAÑISMU

​

El montañismu ye un deporte que se fai al abertal y tien como envís l’ascensión a un picu o monte na que pue variar la dificultá técnica: nun ye lo mesmo subir per una llomba que tener que se garrar coles manes pa esguilar. Equí hemos considerar la escalada como una disciplina deportiva estremada dafechu. Normalmente llévase una mochila con agua y comida enerxético pero tamién ye perimportante’l calzáu, unes botes de treking, anque tamién ye importante ropa trespirable y d’abrigu y agua, el tiempu en monte cambia rápido. Últimamente considérase aconseyable l’usu de dos bastones en cuenta d’ún y esto ye porque se distribúi meyor el pesu del cuerpu.